Num 24 | TVK | STEP |

Numbers 24

10 Melele xa suv toto Balak milong sepinien na provet Balam, xi bulun hen del ekaten e biteni mini bitene, “!Natekesuk otemei inggak tengan osa halesil vaha ni elu navan xil ak! !E be vatol ngamu xiak xa xouk oduxol xat xil! 11 !Taxeak, utilomun uhe tim! Natehit xati tengan nisa sanien tova minuk e Iahova misak ni xouk osakras ovuri.”

12 Balam bit rilomun ni mini bit, “Natehiteni ngamu mi eloheoh nam xil xa otesil xil latemei visal nou xa 13 tave ti neta xa usa vuol ni silva del gol xa di nim man xa mahulong, nasakras namur xoteh rae tova na Iahova. Reitin, nasakras napol ni ti neta tova xa bos mu misa vaxo nenemien navan tang. Nakila nihit kes ni naha xa Iahova biteni minou tengan nihiteni.”

14 Di, Balam biteni mi suv toto Balak bitene, ''Xosali nitilomun nihe visal moletin navan xil. E itiamu xa ni ha, nisa selxatien tei minuk usil naha xa mol-Isrel xil lipol ni mi moletin nam xil e melengien xil xa ti imei.” 15 Di, xi misep mesen ni rae na Iahova mini bit:

“Ngan ak be sepinien na provet Balam, nat Beor,
sepinien na moletin tei xa di pus kil holesok xil xa ti imei.
16 Ngan ak be sepinien na ngan xa di miteong kuhi ni sepinien na Hi,
e nggur kilakilen nggo Hi te ut nesao.
Sepinien xil ak nggo ngan xa di pus kil neta nggo metuveen xil xa Hi te Xeihen di misa ni mini.
Io, xeihen na Hi mei polu e nou, e misak ni nou namot e napus kil holesok xil.
17 Naketeh be sotin e napus melengien xil xa ti imei,
e napus kantri tahal Isrel.
Napus suv toto tei xa mei istal en e xi ixoni hitu tei xa di mileluv bos kuhi mak,
xi mei istal ra mol-Isrel xil e ilaxat kuh xil.
Xi mei ihas vin eilep xil vus tahal Moab,
e imu len moletin xil vus tahal Set.
18 Xi ihas vin moletin xil tahal Edom
e isak ni mol-Seir lihe tovuol mun.
Ileh tan nae xil mei ihe nan,
e xeihen na mol-Isrel xil ita vehakut.
19 Xi xa mei istal ixo mol-Isrel xil ihe tan ni elu nan xil,
e ihas vuol ni moletin sav xil mun e taon tahal Ir xa lameul tamu ladi.”
25 Di, provet Balam mitamea e dilomun be tim san. E suv toto Balak mun nggusil suse nan ba.